已經同居？李璧琦正式入紙排期註冊

現年40歲嘅無綫「唱得」藝人李璧琦（Becky）上月宣布「封盤」，將與拍拖5年嘅跨國企業才俊男友Adrian於7月拉埋天窗，早前佢哋仲大晒喺日本沖繩拍攝嘅結婚相，認真Sweet到爆！而日前二人亦已經正式入紙排期註冊結婚，擬結婚通知書曝光！

當中見到Adrian中文名叫蘇銘熙，同Becky同年出世，只係比女方大接近4個月，而二人亦報稱相同嘅住址，相信佢哋已經過緊浪漫嘅同居生活。

李璧琦回覆東網：「教會婚禮會在七月進行，依家仲準備緊正式嘅請帖，感謝好朋友幫忙設計及製作，希望可以盡快完成發出去並邀請大家。至於籌備方面，因為三月先決定，四月影相，五月先開始籌備，所以除咗好朋友已經開始設計婚紗，仲有好大部份嘅嘢係未落實㗎，感謝朋友們幫忙，我會繼續努力㗎啦！」