唔同溫碧霞寫真比較!羅霖:我嗰本係美容書

2019年06月22日 14:41
東網電視
更多新聞短片
羅霖澄清佢嗰本係美容書。

藝人羅霖以一身低胸紅色連身裙出席活動,講到嚟緊佢出寫真,佢澄清其實呢本係美容書,但透露有少少阻滯:「出版商當初承諾我會喺內地出版,但依家未必做到,我希望佢可以履行當初承諾。呢本書由頭到尾,由資金同資料搜集等,都係我做。尋日我有睇過本書,見到好多嘢都出錯,好似我影咗一千張相,已經揀剩百幾張,有啲相都放唔落,同埋我又有教人化妝扮靚,但點知佢又將化妝品嘅產品相擺咗成頁,我覺得有啲喧賓奪主。(同出版商第一次合作?)係呀,因為呢間出版商都大間有信譽,其實都有幾間搵我,但最後我都揀咗呢間,但香港出書係冇問題。」講到另一位美魔女溫碧霞都出寫真,她說:「我知傳媒都會將我同佢比較,但佢係寫真,我係教人化妝同食療,大家唔同。」

祝前夫幸福

佢透露近日家傭放假,所以呢排要做家務:「要煮飯同拖地,尋日我抱隻狗唔小心跌親,PatPat位附近瘀晒,今日着高踭鞋都有少少痛,原來工人姐姐係咁緊要。之前同細仔去咗旅行,洗衫都洗到凌晨五點。」講到有指其前夫劉坤銘同女朋友打邊爐傾裝修,對此羅霖表示:「祝佢幸福。」