阿Sa自爆第2次雪卵 20粒等解凍做媽咪

2019年07月16日 20:49
東網電視
更多新聞短片
阿Sa自爆啱啱做完第二次雪卵。

英皇藝人蔡卓妍(阿Sa)抱病出席品牌活動,甫受訪就自爆於月頭進行第2次「雪卵」手術,欠缺休息之下體力透支:「要排舞台劇,攰得滯。(第2次雪咗幾多粒?)今次好過上次,加埋Total 20幾粒,夠啦!(點解要做第2次?)其實係一個保障,之後再拎番出嚟用要解凍,個存活率得7成,就未必用到,多啲就穩陣啲。」

「絕食」一星期

問到男友石恆聰有甚麼奬勵?阿Sa聞言大笑急「澄清」:「咁都關佢事咩?我自己嘢嚟。(可能將來關佢事呢?)關佢事先算啦,哈哈!」繼而轉話題指現時心急減肥,再爆為了可以靚靚出活動,「絕食」一星期澱粉質,齋食粉絲:「今次雪卵比上次肥。(肥咗幾多?)冇磅呀,肉眼都睇見,仲要去磅嚟證實?咁會好唔開心。尋日去探Joey(容祖兒)綵排,我話佢好瘦,然後佢一手插去我條腰,講咗句『你都好⋯做番啲運動』!」

阿嬌冇大肚

講到另一好姊妹鍾欣潼(阿嬌)日前出活動突然脹爆被疑有喜,阿Sa即時替阿嬌否認:「唔係!佢荷爾蒙失調,都有介紹個婦科醫生畀佢,幫佢約咗個時間,希望可以幫到手。(佢畀人話大肚有唔開心?)我唔可以代佢答,但係女仔聽到都會有啲唔開心嘅,不過佢係比較樂觀,最多一齊減肥。」為8月的舞台劇緊密排練的阿Sa,卻表示老師及演員都有提醒不要過瘦:「佢哋話太瘦會睇我唔到,但呢啲係自己對自己嘅要求,瘦啲起碼着衫唔使遮。」排練好辛苦?她大呻冇諗過會好攰:「嗰種攰係『陰』啲咁,舞台劇唔同拍戲,拍戲有後期剪接,但舞台劇係要演個過程,不過好開心,學咗好多嘢,又擴闊新領域,仲解決咗我嘅人群恐懼症。」

---------------
立即參加「賞您睇」:http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。