力撐卓林乖女!吳綺莉自爆「被賣」都唔知

2019年07月27日 13:07
東網電視
更多新聞短片
吳綺莉透露依家已經冇喺經濟上支援卓林,但兩母女有保持聯絡。

藝人吳綺莉(Elaine)與女兒卓林母女關係至今雖未有好轉,更有一年多沒有見面,但因為參演一套ViuTV新劇《理想國》,Elaine改變急躁性格,放緩態度與女兒相處,成功保持到母女間定時有Whatsapp問候。Elaine透露已沒再給予金錢支援卓林,放手讓女兒自食其力,好等她於成長階段體驗生活。

「佢激過我好多」

其實兩母女的「暴風歲月」一樣精彩,Elaine在17歲當選亞姐冠軍後踏入娛樂圈,形容自己當年「戇居居」,雖則26歲未婚產女,但相比女兒18歲便宣布「出櫃」、19歲更與外籍女友Andi結婚,Elaine認為女兒活得比她更激!但作為母親的她,對於卓林的行為其實是體諒的,她稱:「我同個女性格都好似,一樣咁硬頸,但我個女本質係乖,自己17歲選亞姐,乜都冇諗,以為請助手點知畀人提名去選亞姐,人哋賺咗筆幾萬銀提名費,『被賣』都唔知,哈哈!(個女又離家出走、又結婚激過你?)佢激過我好多,但都係嗰句,經歷入面學到嘢,我個女都係20歲咋,除非要養成頭家嗰啲特別叻,好生性,否則由16到26歲冇乜家庭負擔嘅年輕人,一般唔知自己想點!」

「唔好咁易受人影響」

多年來性格都是衝動派的Elaine,如令學會了凡事放慢、放緩去處理,所以跟卓林關係未有惡化,但問到與Andi的關係就未有多講,明顯是未能接受這位「新抱」。她說:「我嘅思想正面咗好多!(幫到你同女兒溝通?)不如咁講,唔會有惡化情形。(同個女傾啲乜嘢?)冇㗎,叫佢自己照顧好自己,唔好咁易受人影響,同埋要畀佢知我係愛佢嘅!(有冇畀錢佢使?)冇啦!向好方面諗啦,每個人都要有經歷,咪當係佢其中一個經歷啦!(有冇見面?)好耐冇見佢啦,只係社交平台或新聞先見佢。(接受Andi嗎?)除咗我隻貓同我個女,其他人我唔講啦,你話我自私乜都好啦!」

拍新劇大有得着

Elaine在以未來為題材的新劇《理想國》飾演媽媽,有一個9歲機械人兒子,戲中母子溝通方式都很現代,從中啟發了她的待人處事態度,大有得着,她稱:「人係每個十年轉一個世代,依家啲小朋友同我哋舊時唔同,好叻駁嘴,成日攞住部電話,郁吓同你講人權,唔似得我哋以前,畀老師體罰都覺得好合理,所以同新一代溝通,係要用現代方式!」

從劇本中學習

問到多年沒拍劇,今次拍攝是否習慣時,Elaine直言很感恩:「因為拍個過程都幾沉重,幾難做,好彩冇人搞搞震引我笑!(拍攝時遇上女兒離家出走,心情可有影響?)唔關事嘅,我接呢個劇係因為好反映到依家小朋友、大人同家人之間嘅心態,佢哋遇到嘅壓力,而面對親人就會將脾氣發出嚟,硬碰硬,家庭問題就係咁嚟,所以呢個劇本令我可以抽離,學習點去面對,係有啟發,亦係最大得着!」

冇話唔想搵個伴

女兒長大離家,可有諗過拍拖填補一下突虛?Elaine笑言:「呢樣嘢難過你搵工,我長時間一個人渡過咁多家庭問題,都要啱先得嘅。(想搵個伴嗎?)從來冇話過唔想,但唔好為咗拍拖而拍拖。(條件?)我5呎10,高度同我平頭都唔太難搵,但年紀細過我反而要諗吓!」

服裝: I.T(上衣)
鞋:Giuseppe Zanotti
場地: Stadium
---------------
立即參加「賞您睇」: http://bit.ly/2JWKULh
Click下面粒掣,儲on.cc coins!機票、家電、超市禮券、過萬份獎品等緊你。