囝囝對住空氣嗌姐姐 孫慧雪嚇到毛管戙

2019年08月15日 08:10
東網電視
更多新聞短片
孫慧雪親身經歷!

農曆7月就係相傳嘅鬼月,藝人孫慧雪同李靖筠趁住盂蘭節就「應節」講鬼故,孫慧雪仲將親身經歷同大家分享,一次同囝囝出夜街,囝囝突然向住空氣嗌姐姐同埋傻笑,真係聽到毛管戙!

話說有一次孫慧雪要做嘢,老公就車佢、囝囝同工人姐姐去到工作地點,喺車度傾偈嘅時候,囝囝攞咗佢個銀包出嚟派錢,派完畀車入面嘅三位大人之後,囝囝突然對住車出邊話要派錢畀姐姐,孫慧雪即時跟住囝囝嘅方向望,但出面係完全冇人!成車大人嚇到鼻哥窿冇肉,齊齊決定走人離開呢個恐怖地方,喺佢落車去做嘢時,囝囝原本唔捨得喊緊,突然望住佢嘅身後位置喺度傻笑,孫慧雪雖然已經好驚,但係作為媽咪都要望吓究竟乜事,一擰轉頭發現……身後係乜都冇!

經歷過呢次之後,孫慧雪話會盡量減少帶小朋友出夜街,返屋企嘅時候,喺附近就會開始嗌囝囝中文全名話「返屋企啦!」佢話咁樣做囝囝夜晚喊嘅機會都細啲,講到咁神奇,信不信就由你!

---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。