傳遭無綫雪藏!林秀怡一腳踢撲水養家

2019年08月16日 00:01
東網電視
更多新聞短片
近日因喺網上表態政治立場,疑被無綫雪藏,令工作量大減。

憑無綫劇集《婚姻合伙人》光速彈起入屋的林秀怡,近日因在Instagram高調表態政治立場,即遭無綫「雪藏」,令工作量大減。走投無路下,她只好埋首其餐廳生意,以老闆娘身份繼續「撲水」,努力慳錢養家,以抵其患癌母親的龐大醫療費。

今年27歲的林秀怡入行十年,以《婚》成功打甩「綠葉」Label,劇中一幕與陸永浴缸火辣埋身「肉搏」、被對方出擒拿手「襲胸」,教人睇到津津樂道。好景不常,自從她於IG評論社會議題後,瞬間「被消失」,Out出主持了6年的音樂節目《樂勢力》之餘,又「被缺席」劇集《十二傳說》的宣傳。冇Job在身的林秀怡,去年為救母而花盡畢身積蓄,面對沉重的經濟壓力,唯一出路只能靠開業接近3年的日式西餐廳,據知餐廳已差不多回本,開始進入收成期。

親自落舖慳人手

身為精打細算的老闆娘,節省請人開支的最佳解決方法當然是靠自己,親自落舖打躉,避免有外出使費之餘,又可以做生招牌吸客,一舉兩得。日前見她束丸子頭、戴眼鏡、素顏落舖,各樣事情絕不假手於人,加上曾經有相關工作經驗,即使當時正值午市,全間舖坐滿食客都冇有怕,着上圍裙化身「三頭六臂」,烏身落單、傳菜招呼食客,一腳踢狂做,可謂忙得幸福。

街市買餸煮飯仔

午市過了一半時間,依然座無虛席,直到有長枱食客埋單,林秀怡就埋枱收錢,被食客認出又乘機問食後感兼寒暄數句,頗受歡迎。親自送客後,她即刻執枱兼擺新餐具,再用消毒抹布抹勻枱櫈,睇到地下有垃圾,又無懼着短裙有走光危機踎枱底清理,盡心盡力忙完一輪,疲態盡現的她才有時間飲啖水回氣。

除下圍裙後,林秀怡即趁餐廳「落場」時間閃人,拎住環保袋去附近街市買餸,途中邊行邊撳電話,在菜檔前左揀右揀,相當熟手,收穫豐富歸家煮飯仔,慳盡一分一毫。臨走前途經賣胡椒餅店,被香氣吸引的她最後得個望字冇幫襯,堅持做守財奴。

---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。