衛詩雅馬來西亞拍戲　帶埋「奇怪嘢」返香港

藝人衛詩雅及林德信出席主演電影《雙魂》宣傳。電影題材涉及靈異及神怪，詩雅直言拍攝途中「撞鬼」，直言短期內不會再接拍同類型電影！她表示：「套戲喺馬來西亞取景。我本身屬於大膽嘅，屋企人過年仲圍埋講鬼故添，點知拍完戲返到香港2、3個月，都覺得好唔舒服。戲中有一個道具娃娃，唔知點解我一見到就好想帶返香港，跟場嘅茅山師傅就話娃娃裏面有『奇怪嘢』，今日你到現場先知道劇組帶咗佢返嚟香港！」

幸而後來有朋友出手相助，她表示目前已「問題不大」。記者問她會否將日前身體過敏與撞邪掛勾，她答：「唔敢諗，不過嗰日事前係落過街燒街衣，總之覺得同死神擦肩而過，依家好想搵醫生去做敏感測試，起碼知道發生咩事。（依家驚到夜晚開燈瞓？）咁又相反喎，要全黑，因為我覺得黑麻麻乜都睇唔到，咁就唔會被嚇。」

---------------

立即參加「賞您睇」： https://tinyurl.com/y2e6pmwk

Click下面粒掣，儲on.cc coins！機票、家電、超市禮券、過萬份獎品等緊你。