血肉外翻超恐怖　范瑋琪撞爆下巴縫15針

台灣女星范瑋琪成日都會跌親搞到周身瘀傷，啱啱凌晨佢喺社交網話再次仆低見紅，今次撞傷咗下巴位置，仲上載照片畀大家睇，傷口約兩吋但係好深，皮肉外翻入面啲肌肉組織都見到，血淋淋好恐怖，即時去咗醫院接受治療，結果縫咗15針，佢留言話：「謝謝醫生幫我縫的很仔細！明天還要參加時尚活動，希望大家不要嚇到！」好多粉絲都話畀范瑋琪嚇親，仲留言祝福偶像快啲好番。

其實范瑋琪仆低入院縫針已經唔係第一次，早幾年一晚凌晨去廁所時，失足跌倒撞爆咗眉角，最後喺醫院前後縫咗25針，當時因為佢眼部有明顯瘀痕，網民曾經一度懷疑佢係受到老公陳建州（黑人）家暴。

今朝黑人就上載老婆縫針相同傷口相，真係嚇親隔籬，黑人仲笑言以後都係開燈瞓覺算喇：「昨天深夜范范又摔了一跤，下巴摔了一個洞，當下緊急打給認識的診所，謝謝醫生在最短的時間內幫范范縫合好傷口⋯ 以後還是開燈睡好了⋯???」

范瑋琪下午更新社交網，並上戴一張全身相，見其下巴位置未有明顯受傷痕迹，她發文表示：「謝謝大家的關心，把大家嚇壞了不好意思，人沒事啦，等等在台中跟大家碰面哦。」還上載兩個心心emoji圖案。

---------------

立即參加「賞您睇」： https://tinyurl.com/y2e6pmwk

Click下面粒掣，儲on.cc coins！機票、家電、超市禮券、過萬份獎品等緊你。