靠小八婆收風 李佳芯感謝黎諾懿盲撐

2019年09月12日 22:16
東網電視
更多新聞短片
被傳雪藏的李佳芯感謝黎諾懿盲撐。
藝人李佳芯傳捲入政治風波,原定由佳芯與黎諾懿主演的劇集《BB來了》續集最終易角,改由馬國明及岑麗香頂上。
暗示自資開劇
佳芯與諾懿晚上為無綫大型節目《香港唱好演唱會》錄影,對於無緣拍攝續集,佳芯自言不知情:「我向來唔喺公司收風,我又唔八卦,好多嘢都係靠佢(黎諾懿)呢個小八婆,所有資訊都喺佢身上知道。其實據我所知,拍都係下年嘅事,公司經常有好多變動,一部劇幾時出,或者要拍乜好多時有變動,有變動係唔奇。依家真係有第二集咩?我真係唔知,之前係話停,所以究竟有冇係唔知。(話由馬國明同岑麗香拍續集?)我都係睇報道先知。(失望?)唔會,呢樣嘢又唔係第一次發生喺我身上,試過有啲角色原本搵我亦變咗唔係我,但亦有時有啲角色唔係搵我亦都變咗搵我,呢個係喺公司一直會面對嘅問題。但係有啲可惜,因為同黎諾懿合作係好開心,睇吓日後有冇其他機會合作。」
但黎諾懿拍心口表示將來一定會合作:「冇得拍續集唔緊要,拍咗第一輯已經係好美麗嘅回憶,我擔保一定會再有得合作,有生之年一定會有,最多我自己開戲拍,如果自己開就小品投資,拍續集唔一定要拍,同佢一齊拍其他都可以有新花火。」
今晚係咪解封
問佳芯會否覺得愧對拍檔?佳芯直接問黎諾懿有否唔開心?黎諾懿安慰佳芯說:「我非常開心,你冇拖累我,你一直令我好開心,係我最好拍檔,點樣我都會撐你,我係盲撐你去到邊都係盲撐,我都冇失望,話唔定第二日《BB來了3》係我哋拍呢,希望在明天,一日我哋未退休,一日都有機會,拍續集係咪好都唔知,拍續集壓力大,反而拍其他仲有新火花,《BB來了》只係其中一部成功嘅作品,但亦會有一部超越呢部。」
--------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。