心急搣脂!工藤佑采操波唔黑面

2019年09月19日 23:24
東網電視
更多新聞短片
工藤佑采積極收身。
26歲的工藤佑采,2018年參選港姐12強止步,離開選美舞台,重操OL故業,近日「復出」亮相ViuTV節目的她,比選美時略為圓潤,據知她最近頻頻做運動操Fit自己,早前見她一身運動裝束,現身北角運動場,與同行一男一女打羽毛球,該男女原來皆是教練,男的是國家羽毛球初級教練,女則是中銀紫荊盃最佳女運動員,兩教練陪練波,認真巴閉。工藤打波前與女教練一起熱身,她們坐在地上腳對腳做拉筋、又伸直腰板,一輪熱身後,就隨即開波!初初工藤的球技認真普通,手腳頗為生硬,多次追不上球,男教練對她握拍的動作執得好嚴,指點一輪後,工藤接球明顯有所進步。她又被安排與女教練一前一後接波,練習約半小時後,見其球技突飛猛進,成功抽波後更罕有露出笑容!
事後東網聯絡工藤,對於一次過請兩教練操波,是否趕着操Fit復出?她承認現時未夠Firm,希望回復去年選美時狀況:「嗰位伍Sir係我朋友,之前唔知佢係教打波,最近想試吓玩運動,就搵佢教,佢免費教我,嗰日佢帶埋女助教,我主要想改善手腳唔協調,最初發覺自己唔協調,係唔可以一邊唱歌一邊跳舞,淨係唱歌就得,夾埋一齊就難。(準備復出?)自己都想試吓拍戲做主持,依家有試吓拍段子放上社交網,有好多諗法,有傾過做大陸網紅。」
對於去年因「黑面」成名,她完全不介意,更自嘲:「黑面幾好。我唔講嘢就黑面,咁多年,無乜所謂,外國都好多唔同類型藝人,唔一定個個好甜美,原本個樣係咁嘅風格,都可以展現魅力,可能Fans鍾意我黑面。」對會否再戰其他選美舞台,她笑言可能性不大,自嫌年紀大,但確有朋友鼓勵她參加中國小姐選舉。
---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。