東方日報C1:栢芝秘開店與霆鋒狹路相逢

2019年09月22日 03:43
東網電視
更多新聞短片
月租5萬,栢芝親自Sell客。
勇字行頭的張栢芝無懼跟逆市「交手」,榮升事頭婆!「神隱」約10個月的她被發現於中環開時裝潮店,事事親力親為兼落力Sell客,號召力十足。有眼利網民意外發現相隔百多米正是前夫謝霆鋒的餅店,成為「左鄰右里」。
自去年尾誕下孻仔「小王子」後,連月來減少返內地幕前演出的她,除了全力照顧三位寶貝仔及經營網店外,原來還密謀進軍商界,近日於中環蘇豪區低調開潮舖!新店面積4、500呎,走型格路線,舖面沒有掛上招牌,只在店內中間位置有大圓形型Logo,中央位置放有一張長工作枱,讓栢芝可「打躉」坐鎮,旁邊設有飾物架及小長枱放精品,主要售賣衫、袋及飾物等,據知新舖月租約5萬元。
搵大仔Lucas做Model
栢芝連日來做「生招牌」看舖,為吸引客源,利用社交平台推銷自家商品,不時分享店內情況及個人動態,開張當日,她請12歲大仔Lucas擔任「御用Model」,實行母子檔拍住上,其中以《喜劇之王》為靈感的紀念版手袋最受歡迎,指手袋是大家的集體回憶,官網限量發售。
昨日是周末,雖然新店有員工看舖,但栢芝仍現身招呼客人,當發現記者時,她顯得有點愕然,仍友善地走出舖頭任影。問到新店何時開張?是否每日都會睇舖?她全程微笑答:「我唔做訪問啦!唔好意思,因為我冇叫媒體嚟,唔答喇!」
聞前夫:乜都聽唔到!
講到有網民發現其新舖跟前夫謝霆鋒做「鄰居」,與對方的餅店只相隔百米之遙,栢芝一聽見「霆鋒」二字即秒速耍手擰頭,仍繼續保持微笑說:「哎呀!唔好玩啦你哋,哈哈!Thank you!我乜都聽唔到呀!」記者欲再發問時,即被栢芝用笑容截停:「唔講啦!唔好意思!」然後雙手合十轉身返回店內。
好友李浩林以行動力撐栢芝,落足腳骨力行上斜路,祝賀她開新店,還跟對方心靈相通,齊齊全黑裝及戴黑超上陣,當然把握機會開心Selfie。問到李浩林是否現身撐栢芝?他即笑笑口騷出購自栢芝新舖的新腰包,栢芝在旁即踢爆:「佢係大客!佢全身嘅嘢都係喺度買!」果然是「大客仔」!
更多新聞,請瀏覽東方日報網頁: