過氣花旦爆潮語 李麗珍復出拍劇:年輕咗

2019年09月27日 23:23
東網電視
更多新聞短片
珍妹坦言女兒已經長大,再戰影視圈是最適合的時機,新挑戰帶來動力。
闊別公仔箱5年的藝人李麗珍,最近「復出」拍攝ViuTV劇集《娛樂風雲》,飾演過氣影視花旦,故事講述她在誕下兒子後淡出娛樂圈經營二手衫的生活。珍妹透露當初全因被輕鬆劇情和工作時間吸引,再加上女兒許倚榕快將大學畢業,故沒太多考慮便答應,該劇暫定100集,若添食會加薪,絕對無任歡迎!
新劇與多名年輕演員合作,珍妹坦言過程間令自己回想起入行時:「佢哋勤力同醒目好多,以前返工諗收工,依家就個個都似身懷絕技,起碼準時呢樣最緊要。(有冇代溝?)初頭唔明佢哋啲潮語,依家學到啲,覺得年輕咗同開心咗。(用潮語同個女溝通?)驚畀佢笑,佢覺得我講得唔似呢!」
兩母女經常傾男仔經
既然重新撻着演戲呢團火,珍妹揚言稍後會影視雙線發展,務求把自己的時間填滿。問是否以時間填補感情上的空虛?她說:「好難答,暫時係咁,唔刻意諗感情,等天安排,但我係未Ready嘅!(因為之前段感情唔開心?)冇拉……之前啲嘢唔去諗。」
17歲加入娛樂圈後,珍妹沒有停止過談戀愛,與舊愛潘源良的一段情更糾纏多年,最終換來一次又一次創傷,如今到女兒墮入愛河,她感到孩子如自己當年愛得轟烈,但揀男仔眼光卻比自己道行高。
唔會點個乖女行黑路
珍妹平日也有與女兒傾男仔經,對於女兒的男朋友,她讚口不絕,年輕人打破異地戀界限,至今已相戀幾年,漸漸步入隱定期,男朋友亦懂得行外母政策,她說:「佢會接機、送機,有時佢媽咪燉嘢,又會整埋畀我哋,咁細個都識呢樣嘢,雖然冇煮過飯佢食,但佢見到啲碗碟又會主動去洗,唔錯!(兩家人見過面?)未咁快!(係咪呢個結婚對象?)個個女仔拍拖都覺得係結婚啦!不過我都會分析畀佢聽,唔會點條黑路佢行嘅!」
---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。