J.Arie車廂被非禮唔敢出聲:覺得好醜

2019年10月22日 23:21
東網電視
更多新聞短片
J.Arie喺中學坐港鐵時慘被非禮。
藝人雷深如(J.Arie)除了唱歌外,近年亦積極發展演戲事業,近日播出的ViuTV劇集《假設性無罪》,她亦有份參與,更飾演難度高的角色,其角色Vivian慘被「性侵」,片段更被人發放出去,其後她抵受不住壓力自殺,雖然大難不死,但就變成植物人,對此她坦言角色難度挺高:「尤其是情緒延續,因為啲戲唔係連續拍,睇到嗰條片擺上網嘅情緒係推到最高,而跳樓嗰刻就已係欲哭無淚,因為之前都崩潰晒。」
提到被演員陳子豐「性侵」一幕,她笑言:「呢個角色特別嘅地方係其他女仔都係好靚、着啲衫好性感,短裙低胸背心,但我係全套劇最密實嗰個,着西裝褸入面又有恤衫,又着褲,冚實晒,但唔知點解係我會畀人性騷擾,可能太密實,啲人有遐想,想揭開,我本身幻想係至少我都可能會係show到條bra帶,有啲肉見下,但最後係冇肉見到,佢就隔住件衫喺度摸,但實質係我一路攬住好大個cushion,佢就喺入面上下其手,但其實都係揸緊個cushion。」她笑言整件事超乎預期:「咁筍嘅,我仲諗住有啲啲肉睇吓,點知係冇,都係好事嚟嘅,因為冇人想睇。」
現實中,J.Arie坦言中學時試過被非禮:「我記得有次喺港鐵畀人非禮,當時着緊校服,後面都有個男仔着緊校服,我feel到我pat pat位keep住有啲嘢撩緊,唔知係手定咩,覺得好唔對路,喺塊反光鏡見到我行前,個男仔又行前,行後佢又行後,佢一路用校褸遮住自己隻手唔知做緊咩,嗰刻係好嬲好想講,但點都講唔出,因為覺得好醜,啲人可能會覺得你咩新鮮蘿蔔皮,憑咩人哋非禮你,所以就冇講。」但她坦言換着是現時的自己,一定會勇敢發聲:「隨住慢慢成長,覺得唔講只會畀人恰得仲勁,啲人只會愈嚟愈踩你底線。」她為劇集創作的主題曲《風雨花》亦表達同一訊息:「有時講一樣嘢出嚟會驚畀人鬧、畀人笑、畀人無視,所以選擇唔講,但係咪諗住沉默一世呢?呢個係由細到大好強烈嘅感覺,都好配合套劇、依家呢個時勢。」
化妝:Frances Ho @ Jessica Chan Make-up team
髮型:Bowie Lo
場地:1963木十豆寸
---------------
立即參加「賞您睇」: https://tinyurl.com/y2e6pmwk
Click下面粒掣,儲on.cc coins!機票、家電、超市禮券、過萬份獎品等緊你。