最後一次一齊上節目 泫雅公開向E'Dawn表白過程

2019年11月10日 11:27
東網電視
更多新聞短片
泫雅與E'Dawn昨晚亮相《認識的哥哥》。
韓國27歲性感女歌手泫雅與25歲男友E'Dawn,去年8月高調認愛而激嬲所屬的Cube事務所,二人與Cube在協議下解約,其於今年初與男歌手Psy開設的P Nation事務所簽約。兩人同於本月5日推出新歌,更以情侶檔開回歸騷,昨晚就一同亮相JTBC節目《認識的哥哥》。
今次是泫雅與E'Dawn首次一齊上節目,泫雅表示:「今次係公開戀情後第一次,亦都係最後一次(一齊上節目),我哋講好咗唔會一齊工作,但我諗始終都要上一次節目,就只諗起《認識的哥哥》啦。」
一眾主持追問二人開始戀愛的過程,泫雅就指是自己先喜歡E'Dawn:「雖然講出嚟會傷自尊,但我等咗一年半,佢嘅舉動同我嘅想法相反,等咗幾個月,我哋一齊出活動、一齊練習,但佢都唔問我攞電話,成日同我保持10米距離,令我成日都心掛掛。」
問到E'Dawn在泫雅向自己表白前有何想法時,E'Dawn就說:「嗰時我仲係練習生,我就諗『泫雅點會鍾意我呀』,因為我仲未出道,知道佢鍾意我時,心情都好微妙。」E'Dawn又指當初對泫雅沒有意思,只是覺得巨星對自己那麼好,十分神奇,覺得泫雅和自己想像中的形象不同,是位很帥氣的前輩。
泫雅又分享向E'Dawn表白的過程:「我影咗水果燒酒同燒酒杯嘅相send畀佢,但E'Dawn就答我佢都買咗酒,仲叫我唔好飲得咁急,要等埋佢,我就同佢講『我有說話想講,我鍾意咗你好耐,一直想你發現,雖然我本來唔應該先表白,但你真係太遲鈍,我係鼓起勇氣同你表白,我喺度等你啦。」E'Dawn很快便接受泫雅表白並提出拍拖。
問泫雅覺得E'Dawn給她最印象深刻的驚喜是甚麼?泫雅說:「我話我想要雪櫃,完咗行程返到屋企就見到我想買嗰個雪櫃,裡面有花同信,仲有我想要嗰條頸鍊。」E'Dawn則難忘泫雅為她準備的生日派對:「我自小就比較內向,冇咩朋友,細個時會喺漢堡包店開生日會,泫雅就叫晒所有朋友嚟幫我慶祝,佢生日先過咗冇耐,就幫我準備生日會,真係好多謝佢。」而一向身形瘦削的E'Dawn又爆料指因為同愛吃的泫雅周圍搵食,所以肥了22磅!