追仔成功！蔡少芬第三胎出世　張晉晒全家福

恭喜恭喜！現年46歲嘅蔡少芬（Ada）追仔成功，第三胎出咗世喇！Ada老公張晉喺微博上載一家五口全家福及大手拖小手照，宣布喜訊，更透露囝囝改名叫張樂兒：「11月15日，母子平安，歡迎張樂兒來到張家，我們平安回家啦！」見一臉素顏嘅Ada，精神不錯！

唔會減產

Ada接受東網訪問，她開心地公布：「BB重8磅2安士，好健康，老公有跟埋入產房剪臍帶，好照顧我。一開始好驚，又要重新學習湊BB，但一見到BB嘅時候就好感動同眼濕濕。好感恩又好興奮，多謝上天畀咗一個寶貴嘅產業我。（兩個家姐見到有乜反應？）兩個家姐都已經大個女，所以好錫個細佬，樂兒嚟到呢個家庭會好幸福，有個好愛佢嘅爸爸媽媽同家姐。（會唔會減產湊吓仔？）其實6年前已經封咗肚，今次係一個感恩嘅意外，就算生多咗個都唔會減產，大家記得有工作就要搵我啦！」

張晉：再唔封我封

再度榮升爸爸的張晉接受東網訪問時難掩喜悅，他說：「當然係非常之開心啦，平安。其實不嬲都無諗過會再有，真係封喇！封喇！（封肚），再唔封我封喇，BB出世有3.69kg，都好大隻好健康。」

蔡少芬於2008年下嫁張晉，之後分別於2011年及2013年誕下女兒張楚兒及張信兒。相隔多年後，今年6月蔡少芬宣布佗第三胎！而佢就曾透露佗第一胎時小產，隔咗半年後再次懷孕，之後仲一直希望為老公生番個仔，但努力多時未能成功，如今喜獲麟兒可以話係得償所願呀！

---------------

立即參加「賞您睇」：　https://tinyurl.com/y2e6pmwk

Click下面粒掣，儲on.cc coins！機票、家電、超市禮券、過萬份獎品等緊你