高以翔猝逝　余德丞曾踢波昏迷：好彩醒番

無綫藝員余德丞在將軍澳電視城為節目《娛樂大家》擔任主持，提到高以翔在內地拍攝節目時猝逝。去年踢波突然昏迷，心臟一度停頓的余德丞受訪說：「今朝講波講到六點，之後都收到好多朋友嘅訊息講呢件事，係好可惜嘅報道。（勾起你嘅回憶？）我真係好好彩，其實今年都發生好多唔愉快嘅事，有個桌球運動員、中學生亦都係咁樣過身，自己好好彩可以醒番，仲可以同大家做訪問。（依家身體點？）身體相當好，已經去番以前嗰個生活模式同埋節奏。希望大家量力而為，唔好恃住後生，唔好為工作搏到盡。」

余德丞已經恢復做運動，除了踢波也做健身，但不會像以前那麼劇烈，他說：「因為呢個病冇乜預兆，所以奉勸大家都要去做身體檢查，我半年到一年都會返去見醫生。」