追多個仔？傳郭富城贈100萬氹方媛佗B

現年54歲、天王郭富城（阿城），2017年與方媛結婚，先後誕下女兒Chantelle及Charlotte，今年五月二女出世時，阿城當時透露暫時唔再生，不過今日就有台灣媒體爆料，指城城最近心思思想追仔，想令年事已高嘅媽咪開心，更指為氹方媛首肯，阿城突然送給老婆逾50萬元新台幣（約12萬元港幣）頂級名牌手袋，又表示囝囝出世後會再送400萬元新台幣（約100萬元港幣）做獎勵添。

台媒稱方媛曾向閨密透露，阿城過去從未送超過40萬新台幣（約10萬元港幣）手袋畀佢，最近卻送上50萬元新台幣（約12萬元港幣）手袋，令佢開心不已。阿城有心再生一個仔，始終方媛先32歲，都唔算高齡產婦，再生一胎都得。至於方媛都有意趁年輕再生多一個，由於再生都唔一定係仔，因此二人特別去做健康檢查，亦有傳佢哋向閨密頻頻打聽生仔偏方，睇吓可以點樣「一擊即中」。