鄭丹瑞難忘與黎小田合力「打仗」：係天才

著名音樂人黎小田（Michael）今早離世，享年73歲。藝人鄭丹瑞今早大約九時多現身醫院，指來探望姐姐，逗留十多分鐘便離開。提到曾與黎小田合作《家燕與小田》的他，指大家在麗的年代已經合作：「我寫劇集《天蠶變》，都係佢負責搞音樂，大家合作好多。（知唔知佢有病？）知，我有次喺街撞到佢，當時佢好番少少，精神狀態都OK，都講咗兩句。（知唔知佢咩事？）我真係唔知，我都唔方便問人，好可惜。」

一個寫劇本一個創作音樂

他又謂最難忘與小田合力「打仗」時，他負責寫劇本，小田則負責創作音樂：「嗰陣麗的同無綫打緊仗，我寫劇本，佢寫嘅歌真係一寫就中，我哋講個故事畀佢聽，佢聽完第二日就畀到個Melody我哋，好快，好勁，係一個天才，又好玩得。佢都識我太太，我太太係導演，係綜藝節目組，都有合作。」他又坦言大家在麗的年代，經常聚會，惟近年已少見小田：「每年麗的都有個聚會，大家幾圍咁聚吓，早期佢都有嚟，但近年我以為佢工作忙、退休，所以冇出現。」