《愛回家》玩腳!袁文傑High爆舉到軟晒

2019年12月03日 10:07
東網電視
更多新聞短片
咁算唔算係拍劇之苦呢?
處境劇《愛.回家之開心速遞》一向多諗頭,早前就已經玩過穿越、忘年戀等挑戰觀眾極限,喺新一集《愛回家》中就講到Jenny(陳偉琪飾)、龍力蓮(林淑敏飾)同熊尚善(滕麗名飾)參加賢妻訓練營,去到畢業時,眾女更要放下身段為劇中另一半洗腳,之後三女仲要親吻對方腳背一啖,真係睇見都有味……
當中滕麗名就為「潮偉」袁文傑洗腳,二人事後就喺社交網放上「秘密影片」(即係花絮啦),見滕麗名親吻袁文傑隻腳時,個樣極為享受,點知佢一抬頭即刻喊咁口,嫌棄之情擺晒上面,仲要畀佢發現袁文傑偷拍佢醜態,啋,搞到網友都同情佢甘願為為藝術犧牲!至於負責歎嘅袁文傑,就自爆原來都唔係咁好受,佢就講到演員要拍呢類戲份要好小心唔敢隨便伸腳,而隻腳舉起得太耐大腿二頭肌又會酸軟,真係……你的資訊好有用呀~不過佢都有叫大家畀掌聲滕麗名嘅付出,算你啦!
袁文傑發文道:「其實係咁嘅,但凡一啲表面好似好舒服嘅戲,其實都唔係易處理,好似咁樣拎起隻腳,又驚唔覺意同隔籬嗰個傾偈一時興起隻腳一伸會撞到前「面」,拎起得太耐大腿二頭肌更會酸軟......點都好,三女(滕麗名)跪咗咁耐,都係為咗效果好,請畀掌聲!」