晒廁所撩女片　林建億冧22歲俄羅斯索模

前港姐王愛倫嘅兒子林建億（Chester）向來喜愛夜蒲，而佢亦特別鍾情外籍索女，繼早年公開攬咀外籍女伴，近日佢喺社交網公開戀情，認愛現年22歲嘅俄羅斯索模Nelli。Chester日前大晒與Nelli嘅親密合照，相中佢從後「熊抱」女方，二人頭貼頭黐到實一實，並齊齊流露出甜笑，認真sweet到漏！而Chester更冧爆留言：「I hope everybody finds someone like this」，意指希望所有人都可以好似佢咁搵到一個咁好嘅另一半，間接坐實Nelli地位。

其實Chester早喺8月已經晒過同Nelli嘅合照，見Chester趴喺梳化上，而Nelli就坐喺佢身上，二人表現親䁥。而喺Nelli嘅社交網亦有不少索爆性感照，大騷美好身段。雖然Chester依家「名草有主」，但照舊不時喺網上大晒夜蒲相，日前更上載一段喺廁所撩女仔嘅片段，仍不改其貪玩本色。