最想拍鬼片　李天翔冇後悔離巢

藝人李天翔出席電台訪問，他約滿無綫回復自由身，提到近日莊思敏再續約無綫，而新約中可亮相友台，天翔表示都有留意報道，雖然當時未有這種新約，但他不續約無綫與能否亮相友台無關。

現再拍回無綫劇機會可變大？他謂原本監製劉家豪有找他拍《逆天奇案》，但當時撞了電影擋期而沒有接拍，若檔期和價錢OK都可以。講到現社會狀況可影響工作量？他坦言：「係差咗！（唔會覺得離開無綫Timing唔啱？）又冇，因係拍攝《解決師》時已決定履行完最後一年合約就唔簽，因覺得係要為自己諗後路，因自己已經唔細，其實無綫好好，傾續約係有加人工，但因簽3年，如果3年之後事業都係冇起色，而娛樂圈都不容我呢個人，咁我先再走出去會太遲，但若果我仲係廿歲頭我係一定會繼續簽，因冇無綫又點會有御用強姦犯同反派王呢個稱號。」不過，天翔表示現在暫時拍戲仍跳不出演這類角色，但自己最想拍鬼片，因未試過，亦好鍾意睇鬼片。