放棄拍功夫片後繼無人 甄子丹難忘大戰泰臣

2019年12月04日 20:21
東網電視
更多新聞短片
甄子丹宣布放棄拍功夫片,袁和平擔心後繼無人,希望可以找到可造之材繼承。
藝人甄子丹、動作導演袁和平與導演葉偉信於深圳出席《葉問4:完結篇》記者會,眾所周知,甄子丹和被稱為「天下第一武指」的袁和平,有着一段長達30多年的師徒緣分,今次二人重聚。早前已宣布不再拍功夫片的甄子丹表示,袁和平既執導了他的第一部功夫片《笑太極》,也是他最後一部功夫片《葉問4》的動作導演,言辭間對師傅充滿感激。
《葉問》系列拍到最終回,甄子丹被問過去跟不同對手比試,誰最難忘?他指是拳王泰臣(Mike Tyson):「因為我係拳迷,佢喺拳壇係一個傳奇,知道同佢對打,我抱住演員同拳迷嘅心態同佢對打,印象非常深刻,另外喺《葉問2》裏面同洪金寶圓桌上對打都好深刻,同張晉嘅決戰場面都好深刻,相信為影迷留下深刻印象。」
動作片可混入不同元素
談到不再拍功夫片,甄子丹詳述自己的想法:「我唔再拍功夫片,唔等於我唔再拍攝動作片,因為武俠片可能需要吊威吔,動作片可能混入咗格鬥同科幻元素喺裏面,但功夫片只會喺中國電影圈先出現,喺外國唔會有,然後演員演功夫片係必須要有深厚嘅功夫底子,要有一定水平,要演出特別特定嘅節奏,一招一式、腰、馬步……表現風格係獨有嘅,係其他動作片唔會有嘅,對於呢類影片,我實在感到好攰,但對於其他類型嘅動作片,我仲有一啲諗法,希望以後陸續喺其他電影中呈現畀觀眾睇。」
望能找到可造之材傳承
袁和平睇住甄子丹入行,知道甄子丹不再拍攝功夫片,他感到十分可惜:「甄子丹初入行時有啲懵懂,但佢一直努力學習,到《葉問4:完結篇》已經有超水準表現,依家有啲動作設計已經有佢個人嘅特色,已經後繼無人,希望甄子丹可以為影圈尋找到可造之材作傳承。」甄子丹聽罷袁和平的評價,笑言日後或會於幕後參與功夫片。
中國功夫如何影響世界
今次《葉問4》加入了李小龍情節,也就是為了突顯葉問與李小龍如何將中國功夫帶到國際,葉偉信說:「葉問係李小龍師傅,當年李小龍嘅功夫影響全世界,呢個係真事,但佢嘅師傅葉問都好很影響力。其實除咗詠春,中華武術中好多師傅,喺嗰個年代,都有發揮佢哋嘅影響力,所以當時我拍完第三集,就覺得呢個故事應該係去睇中國嘅功夫點樣影響全世界。我相信甄子丹肯定知道,因為當時佢就喺外國生活,佢會好清楚呢個情況。」