被焦浩軒摸面傳緋聞 岑杏賢落閘派檸檬

2019年12月05日 00:00
東網電視
更多新聞短片
岑杏賢同焦浩軒傳緋聞。
無綫藝人岑杏賢(Jennifer)與袁偉豪甩拖3年,分手後男方撻着張寶兒,屢傳明年拉埋天窗。至於Jennifer近月破Dry成功,有傳31歲的她與28歲藝人焦浩軒合作節目而撻着,大玩「姊弟戀」!憑處境劇《愛.回家之開心速遞》角色「阿壯」彈出的焦浩軒外形高大,最近與Jennifer合作主持節目《流行都市》,由於二人均「浸過鹹水」回流香港發展,同聲同氣,加上日對夜對而日久生情。
約埋收工
有指二人9月時撻着,經常一齊收工。早前他們拍《都》時玩直播,當談到「約埋收工」話題時,焦浩軒情不自禁當着其他主持面前,擰轉頭摸Jennifer面脥後說:「我哋會約埋㗎!」見Jennifer非常受落,關係匪淺。同是10月生日的二人,據知上月初拍外景後,齊齊與工作人員慶祝,期間獲安德尊祝「百年好合、永結同心」,Jennifer更當眾向焦浩軒獻吻!
日前Jennifer現身銅鑼灣,問到是否與焦浩軒拍拖?她愕然說:「梗係唔係啦!點解咁傳?」提到男方摸她面頰,她說:「咁搞笑?(安德尊祝你哋百年好合。)講笑之嘛,大家唔好咁認真啦!(真係冇拍拖?)唔係,同事嚟咋!其實我都好突然,冇諗過。」但問到是否有追求者?她即甜絲絲承認:「依家有人追,但唔係焦浩軒,哈哈!(發展中?)了解中,圈外人嚟嘅!」說畢即驅車返將軍澳寓所。