玩命遊韓 嚴崇天唔守規矩險飛出車

2019年12月05日 07:30
東網電視
更多新聞短片
掛住拍節目都要小心!
前有線主播嚴崇天(Douglas)熱愛韓國文化,曾到首爾進修韓文,能說得一口流利韓文而成了圈中的「韓國通」。早前他又飛到韓國,頻密到就連Douglas也覺得未曾離開過,而這次他到訪遠離市區的忠清北道拍節目。
時間膠囊保留記憶
清風文化遺產園區內的清風館,從前是一個衙門,現在變成遊客的觀光點,Douglas笑道:「唔好以為係一條木櫈,其實係古時行刑的刑台,等我趴低畀大家打50大板啦!」
另外,忠清北道的堤川,有一個放置時間膠囊的地方,他說:「係畀你放一啲珍貴或有紀念性嘅物件,等十年或二十年後再攞番出嚟,我都好想有個時間膠囊,但可惜已經額滿咗。」
登頂觀景淆底腳軟
忠清北道有多個旅遊景點,Douglas到了堤川、忠州及丹陽,名為「丹陽滿天下」的天空步道Sky Walk是120公尺高的鵝蛋形瞭望台,Douglas說:「上到頂除咗可以欣賞到南漢江,亦可俯瞰小白山、月岳山,地台係透明玻璃建成,企喺度影相我係有啲腳軟嘅。」膽生毛的Douglas還去挑戰高空飛索Zipline:「之前我仲笑人玩唔好嗌咁大聲,點知係我嗌得最大聲,其實嗰度仲有滑翔傘同埋單軌列車,只係時間太緊迫玩唔切。」
與單軌列車無緣,卻玩了另一款斜坡滑車Skyline Luge,雖然不算危險玩意,卻嚇到Douglas一額汗:「係自己唔啱,偷雞一路揸一路拍嘢,搞到有啲失控,差啲飛咗出車,心都離一離,所以,大家玩任何嘢都要守規矩。」
自製韓果雞手鴨腳
另一日,Douglas前往了製造韓果和護膚品的工坊,他說:「韓果係韓國祭祖食物,因為以前冬天冇生果,所以就製作韓果嚟代替,依家就變成送禮手信,係用糯米粉再加堅果同糖漿撈埋一齊壓成餅再切成條狀,有啲似我哋食嘅米通。雖然有Miss教我哋整,但我又冇留心啦,掛住影相啦,十指不沾陽春水嘛,雞手鴨腳咁,整崩晒,又切到爛晒,切得唔靚嘅惟有自己食番,食到好飽囉。」吃飽後,他到一個漢方中草藥工坊自製護膚品,愛好韓國護膚品的女士應該好有興趣。
Chok到夠攞你命三千
忠州的中央塔及彈琴湖,是韓劇《福秀回來了》的其中一個場景,遊客只要捐出善款3,000韓圜便可以免費穿着韓服2小時,適逢紅葉季節,穿上韓服的Douglas學足古裝劇中的書生倚在樹底下看書狀甚詩意,然而腳下一雙白波鞋卻成「穿崩亮點」。忠州亦有生果園可以讓遊客摘蘋果,Douglas說:「入場費10,000韓圜(約70港元),畀你可以摘滿一個紙箱,差不多十幾個。」因為很少機會吃到樹上摘下的蘋果,所以同行眾人都忍不住即摘即食。