半年搵8千萬　19歲歐陽娜娜北京睇豪宅

現年19歲嘅歐陽娜娜有「仙氣女神」之稱，除咗外形睇得仲玩得一手好好嘅大提琴，12歲就舉辦咗第一場個人演奏會，成為台北國家音樂廳有史以來年紀最細嘅獨奏家。近年多線發展嘅佢有涉足唱歌、電影、劇集、綜藝節目及廣告等，演藝圈中任何地方都可以見到佢嘅身影，近年專注喺內地發展，有指人氣高企嘅佢2018年上半年已經搵咗8千萬港元，一年賺過億可以話冇難度！

榮升小富婆嘅歐陽娜娜近日現身北京，由媽咪同助手陪同去睇豪宅，呢個豪華屋苑想睇樓係要提早預約，所以娜娜絕對係有晒心水先至去睇，佢哋睇足兩個鐘先至走人。雖然娜娜搵錢能力強勁，但係佢平時唔會亂用錢，好似出入如果唔係要做嘢，佢都會揀搭地鐵夠晒貼地，難怪19歲女就可以儲一大筆錢去買豪宅！