接囡囡歸家！周柏豪冧爆自誇成功換尿片

35歲周柏豪日前秘密「升呢」做爸爸，愛妻Stephanie為他誕下「前世情人」，今日約中午12時30分，保持低調作風的柏豪早於醫院後門準備定7人車接妻女出院，黑、白色打扮的柏豪先單獨見傳媒，甫出門口就雙手合十打招呼，問到可習慣爸爸新身份？他笑笑口冇答，但就冧爆話試過幫囡囡換三次尿片：「成功嘅！舒服嘅！（改咗名？）未改，返到屋企再研究，都要問長輩。（有冇乳名？）都係叫囡囡咋。」

太太激罕現身

問到可會放假陪妻女？柏豪表示：「放咗幾日，成個禮拜都喺醫院陪佢哋，之後要努力返工，賺奶粉錢，雖然係有Sponsor，但都要賺。（減少出埠工作？）到時先算，依家照顧佢哋兩個先。（太太身體好嗎？）托賴都好好！」說畢再雙手合十表示「辛苦晒」。未幾，囡囡由柏豪媽媽抱實出院，BB被毛巾包冚，令B女靚樣未有曝光。而戴黑冷帽、穿黑衞衣配乾濕褸兼戴上口罩的太太Stephanie，激罕現身緊隨其後，一言不發急急腳上車，柏豪待安頓好家人才上車，然後座駕直駛離開醫院。