咁都得？Baby撞期冇現身　P圖當行紅地氈

女星Angelababy原定尋日出席假北京舉行嘅時尚活動，但因為工作撞期而未能出席，但Baby竟然離奇現身活動，仲喺Backdrop前影靚相！原來Baby以表心意，特意影咗輯靚相畀大會，而大會就將Baby P圖成恍如現身紅地氈一樣，Baby工作室留言：「由於行程衝突未能親臨盛典現場，BOSS Angelababy遠程『盛裝出席』聊表心意，風格先鋒，時代新生。」

不過，「隔空」出席活動引來唔少網民爭議，留言「服了，拍戲也P，這也P」、「真的用心」、「電視劇都可以P，何況這個都是小事」，亦有粉絲心痛Baby工作檔期太緊密，叮囑要小心身體、唔好操勞過度。

Baby唔係第一次利用偉大嘅P圖技術，2017年與鍾漢良合作內地劇集《孤芳不自賞》，由於同場拍攝時間唔夠，只好用替身上陣，後期製作P番Baby上去。