群星恭賀燈光師60大壽　馬國明懶理心穎回歸

潛水8個月嘅黃心穎今日返港，雖然尋晚已經一早有傳言，但佢嘅前度馬國明就「我有我生活」懶理舊愛行蹤，同一班視后視帝為無綫效力多年嘅燈光師釗哥最近60大壽，仲笑好開心！

現場所見，有三位視帝郭晉安、黎耀祥、馬國明，仲有視后佘詩曼（阿佘）、高海寧（高Ling）、張曦雯、陳煒、潘芳芳、年過70歲嘅姜大偉等出席聚會，陣容非常強大，加埋一班幕後工作人員，非常熱鬧！

飲到面紅紅嘅阿佘喺社交網開心表示自己着到靚靚咁出門口，媽咪問佢去邊度，佢就話一個TVB嘅燈光師60歲生日，由《宮心計》、《公主嫁到》、《天與地》、《火舞黃沙》都打燈打到佢好鬼靚！阿佘又話見到釗哥健健康康、開開心心，佢哋都好開心！

至晚上9時許，戴上眼鏡嘅馬國明喺壽星仔陪同下步出取車，兩人傾談幾句便揮手道別！