大合照晒柔軟度搶鏡？陳曉華自爆背後苦衷

前港姐冠軍陳曉華（Hera）平時鍾意運動同跳舞，又曾經多次表演高難度空中瑜伽，柔軟度極高。呢日佢相約朋友去做運動，自言好耐冇做運動嘅佢，似乎筋骨都冇硬到，輕鬆做出一字馬。而Hera同朋友影相時，更大騷Quali將隻腳舉起拉近頭部，完勝晒咁多個朋友成功「搶鏡」！但原來一切都係誤會，佢解釋話：「我做呢個動作，只係我真係想畀大家見吓，我對鞋係彩色好靚，點知都係睇得唔清楚。」