表揚黎小田音樂會　前妻關菊英當日會…

音樂人黎小田（Michael）月初病逝，為表揚他對樂壇貢獻，音樂界一班朋友攜手為他於明年1月10日假旺角麥花臣場館舉行一場「To 小田：With Love Forever 音樂會」，落實演出歌手包括薛家燕、黎瑞恩、泳兒、杜德偉、麥潔文、徐小明、陳欣健、李龍基、柳影虹、布志倫等，另外還有好多歌手度期中。演唱會門票明日公開發售，門票收入在扣除相關開支後，將會全數撥捐「K For Kids Foundation」，用作支持及培育弱勢社群的小朋友學習音樂用途。

今午薛家燕聯同一眾主辦商會見記者，她坦言知道有呢個騷，即刻度期參與。可有邀請Michael前妻關菊英合唱？演唱會監製錢國偉表示菊姐當日不在港。薛家燕透露到時必定會唱《心肝寶貝》，又指當年她與Michael拍了個搞笑版《胭脂扣》短片，希望到時拎出來跟觀眾重溫。她又重提當日Michael喪禮上有隻蝴蝶，她都覺得是Michael：「隻蝴蝶個身好似鋼琴個keyboard，仲係黑白色，Michael又最鍾意着黑白色，佢一直伏喺張櫈度，伏到第二日儀式開始，佢就飛咗去靈堂Michael張相下面啲花度，我哋個個都走去同佢影相合照。」