身體年齡得廿歲！黃榕除夕生日要食自己

藝人黃榕下午到上環，為慈善月曆影靚相。即將於12月31日度過38歲生日的她表示：「我係負責影12月份嘅，但我年年18歲咋，況且我近排做咗個身體檢查，發現我嘅身體年齡得20歲，好開心。」

「以前拍拖個個都唔錫我」

由於生日撞正除夕，她以往都在工作中「慶生」，今年反而放假，至今只接獲一班好姐妹邀約：「冇男人呀，要食自己，希望嚟緊會遇到位錫我嘅男仔。以前拍拖個個都唔錫我，不過我份人好專一，唔會玩一夜情，對上嗰個都拍咗拖3年。」談到擇偶條件，身為健美專家的她打趣想搵「綠巨人」，壯男才是她那杯茶。

新片全裸晒背

至於工作方面，她透露稍後會接拍一套驚慄搞笑片《食人狂魔》：「過幾日就試造型，戲內我扮演一位靚靚老婆，有小鮮肉老公，有一場戲講我沖涼，要背部全裸，所以依家積極做緊美臀功夫。（咁性感片酬收多啲？）依家呢個市道有工作已經好好，都有5位數片酬嘅。」