林峯晒恩愛張馨月離奇凸肚　網民：懷孕？

藝人林峯同張馨月自從入紙申請註冊結婚後愈愛愈高調，每逢過時過節梗會喺社交網Po相晒吓恩愛，嚟到平安夜佢哋又點會少得放閃呢！林峯上載咗同張馨月加林夏薇夫婦嘅合照，林峯攬到另一半實一實，成張相都充滿紅粉色泡泡好溫馨！佢留言：「冬至團圓宴，平安歡樂餐！」而林夏薇亦有轉載相片並寫上：「平安幸福！」

有網民留意到張馨月嘅腹部明顯凸咗出嚟，仲留言問林峯係咪就嚟做爸爸，不過睇真啲張相，應該係張馨月件恤衫比較鬆身，加上佢又微微向前彎腰，先至會出現「大肚」效果。