聖誕厚禮！Kim送贈MJ舊外套給女兒

美國真人騷女王Kim Kardashian出名寵仔女，前日6歲女兒露芙（North West）與家人外出時被見到拎住個價值1萬美元的名貴手袋，話口未完，Kim昨日Instagram亦放相爆佢同老公Kanye West送咗件已故樂壇巨星米高積遜（Michael Jackson,MJ）着過嘅外套贈囡囡作為聖誕禮物，認真誇張！

件外套係MJ於1997年出席好友伊莉莎伯泰萊（Elizabeth Taylor）65歲生日派對時穿着過，據知今年10月Kim與老公在拍賣會上以65,625美元投得。Kim留言說：「露芙係米高積遜超級fans而我哋知道佢會鍾意呢個。我哋為咗露芙今個聖誕而成功投得，而我哋將件衫縫好等佢可以穿得上。等佢大啲嘅時候，我哋可以將隻袖放番落嚟，可以成世着住。」Kim更補充指囡囡好興奮同慶幸收到呢份提早送嘅聖誕禮物。