等足一日拍10秒鏡頭　黃子桐竟然嗌開心

2018年落選港姐黃子桐加入無綫，早前更有份喺節目《娛樂大家》擔任「娛樂女郎」，佢話能夠參與拍攝真係好開心：「可以同咁多重量級人物做節目覺得好榮幸，我記得第一日拍攝嘅時候，我等咗差不多成日，就係為咗拍一個10秒嘅鏡頭，但原來阿姐（汪明荃）、阿公（蘇永康）同監製全部都見到，都對我有讚賞，後尾我就可以參與更多環節，所以我覺得做一個新人真係要每一個時刻都要認真，同埋努力去準備。」

喺大學主修犯罪學嘅佢，對狼人殺環節十分感興趣，仲喺隔籬睇到好肉緊，有啲嘉賓喺拍攝前仲會問佢取經：「雖然正式拍攝時我冇落場玩，但有時拍攝前我都會同嘉賓落場試玩，因為我本身自己讀犯罪學，我都會運用一啲微表情、微動作去分析玩家嘅身份。我都試過好準確咁估中咗刺客嘅身份，搞到大家都對犯罪學好有興趣。」