四太最幸福！超盈猷君三代同堂過元旦

賭王何鴻燊四房去年喜事一浪接一浪，8月超盈誕下愛女「荷包蛋」，之後10月猷君榮升爸爸，其超模太太奚夢瑤為他誕下賭王第一位男孫何廣燊，到咗尋日元旦，幾位子女就聚首一堂與勞苦功高嘅四太梁安琪一齊過，真係甜到漏呀！

見超盈凌晨喺社交網晒相，除咗見到四太、超盈與哈佛學霸未婚夫辛奇隆、猷君及奚夢瑤外，又見到猷亨同大個女嘅超欣現身，當中超盈、奚夢瑤及超欣都少有地齊齊以Smoky eyes上陣，加埋超盈晒出「荷包蛋」Cute爆裙仔Look，似乎今個新年佢哋三代同堂慶祝，幸福滿瀉。