為搵錢唔怕去疫區　麥長青做好防禦措施

藝人麥長青（麥包）今日現身嘉年華擔任活動大使，自認無魚不歡的他，笑言餐餐都要食魚：「就連阿佘（佘詩曼）都笑我，但漁業依家經歷低潮期，都想多啲幫手推廣。」計仔多多的他已經諗好「大計」：「拍片擺上網教整魚，首要想向家傭埋手，因為佢哋負責煮嘢食。（做KOL？）依家傾緊㗎！呢個渠道夠晒方便，任何人都做到，可以嘗試。（你最拿手整咩？）我娶老婆前後都好少入廚房嘅，個廚房唔係我，老婆好好，知我鍾意食嘢、飲湯，佢好畀心機學煮，依家有一番成就，最近仲整緊蘿蔔糕。」

講到內地武漢現爆發疫症，問到自由身的他若有內地工作接洽都會冒險前往？麥包指冇所謂：「只要做好防禦措施就得，我知張兆輝同陳豪啱啱先去完。（你唔怕？）OK啦，唔係講得咁嚴重嘅，當地衞生部門應該睇得好好，去啲空曠嘅地方做活動，少啲接觸，帶定消毒紙巾，始終藝人係我份職業。」