陳輝陽情人節開騷　冇得再加場

音樂人陳輝陽及「女聲合唱團」的Lydia到電台受訪，宣傳情人節2月14及15日的麥花臣音樂會。陳輝陽表示上次宣傳後，7、8日已賣晒兩場的門票：「再加場真係唔得，依家唔使蝕都ok。（有冇朋友話搶唔到飛？）都冇法，有諗過如果要加場係得嘅，但依家社會蕭條，有啲朋友都話唔想出街。」他又謂開騷有很多困難地方：「一啲冇諗過會有問題嘅地方都發生問題，但要克服，因為我講過點困難都會run個騷。」

他又謂現時已排練緊個騷，大家都很努力，又透露這個騷是三部曲的終章，問到之後不會再搞下去？他表示：「未必，其實開頭都冇諗過會有呢個騷，係上次第二部曲喺伊館做完，我喺樓下就諗到個idea，我諗起《會過去的》嘅歌詞，『往事就像是一道橋』，上天畀個idea我，叫我喺條橋度搞騷，所以可能到時我又會有idea都未定。」他透露今次麥花臣會搭道橋出來，更會開四面台。而講到旺角不時會有社會運動，問到可擔心？他表示：「個場一年前已book，好難轉場，有信心會run到，我哋情人節個期又靚。」