小肥忘送飛給歌迷親友　錄影前網上急散貨

歌手小肥和黃妍為ViuTV的音樂節目錄影，兩人分別選唱自己歌曲及別人的歌，小肥稱：「會唱番當年舊公司金牌年代嘅歌，好似《寵物》、《時光機》，仲有揀咗側田嘅歌！」而黃妍稱選了王菲的《郵差》：「自己好鍾意王菲，知道可以唱佢嘅歌，都同自己講要好好咁唱。」雖然小肥唱歌經驗豐富，但他說若錄影兼且有現場觀眾都會有些壓力：「因為錄影唱得唔好要再錄過，咁怕影響埋現場觀眾。」

至於在見傳媒數小時前，小肥在網上上載一疊入場券的照片，表示大會之前給了他40張入場券，讓他送給歌迷或親朋戚友來現場打氣，沒料他完全忘記送給人，40張門券原封不動，要急找人來捧場。小肥自認大頭蝦笑言：「即刻喺網上求救，好彩都有啲反應。（依家出門口派畀人？）我諗都要。（急召公司員工嚟撐場啦？）咁又唔好。（睇完騷請食飯？）咁威逼人唔得嘅。」可擔心被監製鬧？他即言：「唔會，監製好愛我嘅。」