拍緊續集？李施嬅重返金宵大廈風騷開工

無綫大熱劇《金宵大廈》大受觀眾歡迎，除咗喺《萬千星輝頒獎典禮2019》角逐多個獎項，仲已經落實拍續集！說時遲那時快，已離開無綫嘅女主角李施嬅喺Instagram透露重返「金宵大廈」！

施嬅上載多條片，tag住金宵大廈，片中嘅佢問大家：「估吓我喺邊度？金宵大廈嘅入面，即係香檳大廈！」雖然唔見男主角陳山聰，但就出現另一人物，佢就係海俊傑！施嬅問對方：「點解你會嚟金宵大廈㗎？你嚟搵Alex定CoCo姐呀？（施嬅劇中兩個角色）」、「阿蕭呢？」海俊傑就笑言阿蕭畀佢消滅咗，答案非常神秘！兩人又風騷唱出《今宵多珍重》，唔通真係拍緊《金宵2》？好令人期待呀！