激讚王梓軒舞台劇演出 莫文蔚:得佢先做到

20200109
東網電視
更多新聞短片
王梓軒喺舞台劇嘅演技大獲好評!
由歌手王梓軒主演的舞台劇《利瑪竇》part 2,上星期開鑼,恩保德神父對梓軒首場嘅演出高度讚揚,並話:「做得好好,有99.9分!」而第三場當晚,莫文蔚與哥哥莫理斯前來捧場,並異口同聲力讚梓軒演出精彩。
觀眾有更多共鳴
今次梓軒重演利瑪竇,與上次一樣,由利瑪竇少年演到老死,壓力不小,除了排練時間比之前少一半外,對白要講文言文、意大利文同拉丁文都甚有難度,梓軒說:「每次演出都係出盡全力,上次已經覺得做到最好,但今次再深化,發現上次演漏咗好多嘢,因為實在好多台詞、好多歌,由三十幾歲,演到六十幾歲死埋,就算掌握到個流程已經好忙。今次就喺入面搵番好多友情、情義、親情,人性嘅軟弱,令觀眾有多啲共鳴,愛同堅持,講好似好抽象,離我哋好遠,但今次演活咗。」
大讚犀利勁震撼
莫文蔚捧場後大讚:「好勁呀!成件事好震撼,同埋我覺得Jonathan(王梓軒)好犀利,得佢先可以做到,冇人可以做到呢個角色,真係冇第二個,佢一出場已經覺得好靚仔,哈哈。」氹得在旁嘅梓軒笑說:「因為真係似一個西人。」莫文蔚續笑說:「都似㗎!你和尚Look都好得,今次幾驚喜!(有冇邊一part感動到你?)有,有好多,我都係基督徒,裏面講嘅好多嘢都打動到我,我覺得成個騷都好難,真係好難,啲音樂、拉丁文、意大利文,好深嘅嘢。」
期待將來可合作
梓軒希望有一日可以與莫文蔚一齊做音樂劇,更即場邀請對方,莫文蔚即說:「可以,好呀!你報咗名喇?」梓軒搞笑咁話:「我做幫你擔轎嗰個(車伕)!哈哈!」莫文蔚即表示佢當然要做坐轎嗰個啦!