《多功能》開續集 王梓軒翻生演出?

20200110
東網電視
更多新聞短片
如果續集落成,相信大家都好期待!
藝人王梓軒日前被拍到於中環試西裝,事後問他是否正預備台慶戰衣?他表示:「係呀,我每次去啲重要場合都會去嗰度揀西裝,佢哋都好知我嘅身形。雖然今次台慶頒獎禮,我冇個人嘅提名,但我有份演出嘅《多功能老婆》有十八項提名,所以都要落力撐場支持。」
為續集留下伏線
對於有指無綫欲開《多功能老婆》續集,王梓軒則表示:「我都有聽過吓,但唔能夠確定,都要睇過年後問埋千嬅先知最新消息,同埋我都好期待想知道,續集我可以點參與,因為今集角色已經慘死咗,不過寶華姐(陳寶華)都好低調咁有個伏線,講我有一個孖生兄弟,唔知係咪可以係續集出現,就算出現都應該唔同性格,會好好玩同好有挑戰性,不過,真係唔知之後究竟會點,或者拍《多功能老公》,又或者原班陣容玩一啲新嘢都唔定。」
孖陳煒「情侶檔」搵銀
王梓軒直言今次拍《多》片最特別的地方是配搭好新鮮,而且默契十足,所以他對「最佳劇集」頗有信心:「應該好有機會攞呢個獎,到時一齊緊張、一齊去期待,今次好開心可以跟台前幕後合作,當中仲有我好好嘅拍檔陳煒,唔少廣告客戶睇咗個劇,都覺得我同煒哥(陳煒)嘅組合好正,會有唔同形式嘅合作,當然我想同佢繼續拍戲,不過一齊唱歌都好,佢都有上過一啲唱歌節目,我哋合作唱歌應該幾有新鮮感。」對於劇集受歡迎,亦受到不少網民支持,王梓軒直言:「好多謝各位網民對套戲嘅支持同投票,祝劇組好運!」