被彭秀慧投訴加戲 張錦程坐輪椅翻車

20200112
東網電視
更多新聞短片
彭秀慧再同張錦程合作。
同樣演舞台劇出身的彭秀慧和張錦程,再度於電台連續劇合作,飾演一對情侶,其中張錦程的角色是演一名輪椅人士。彭秀慧笑指再同大師兄張錦程合作心理壓力好大:「想當年1995年同佢拍完個舞台音樂劇就好少聯絡,仲記得我做妓女、佢做嫖客,今次見番佢,佢成個人唔同晒,唔認得佢!」續爆張錦程為入戲可以去到好盡:「聽過佢之前為咗個角色可以演得躁啲,就唔食菜,只食肉,真係唔知佢今次唔食咩,不過同佢係好好玩,係聚舊,好珍惜一齊食飯時刻。」
張錦程指拍攝前都有同導演、監製深入研究劇情,講到他要坐輪椅,他表示起初都有練習:「都驚唔知點用,但部輪椅係運動型,即係傷殘人士打籃球都係呢部,操作起上嚟都好靈活。」隨即自爆曾不小心翻車:「好少速度快嘅場口,有場戲要好快,因為我冇烏前個身就翻車,好彩我有條辮卸力。」
談到拍攝趣事,彭秀慧「投訴」對方成日加戲,笑言要喝止張錦程:「每次加完對白都唔同晒,但我哋有默契,都OK,經常打打鬧鬧,啱番戲中對情侶嘅狀態。」飾演情侶可有親熱戲?張錦程說:「電台劇集有幾親熱呀?」彭秀慧說:「冇睡房景,好自然成日黑面,其實先係真實情感。」並透露最後一場爆喊戲份,最為真情流露兼深刻,重拾到做演員的樂趣。