離巢無綫照去頒獎禮　劉江：未睇過外邊世界

人稱「劉老師」的藝員劉江，京劇出身，年屆73，入行超過50年，有無數影視作品，演戲經驗豐富，自加盟無綫後於不少劇集都演出重要角色，而最近的《金宵大廈》中，劉老師亦有精彩演出，更憑此劇角逐今晚《萬千星輝頒獎禮2019》的「最佳男配角」，不過同時爆出劉老師原來與無綫冇再續約，但他仍然盛裝赴會，出席畀面派對。對於冇再續約，劉老師叫外間不要問他為甚麼，永不言休的他其實仍有戲癮，笑言自己多年以來，未看過外邊世界，所謂一山還有一山高，不要以為自己「好掂」，所以，有好戲他亦會接拍，只是稍有點累想休息一下而已。

他受訪時說：「今晚出現係因為有個心結，《金宵大廈》對我嚟講係個情義結。（你提名男配！）大家心照啦！做咗37年，有時開工到後零晨3、4點，揸車返元朗屋企，好似唔知自己做緊咩咁，所以早前諗就算再續約都要減產。（自己決定唔續？）佢（公司）開聲好過我講，有啲底線唔可以過唔到自己，公司對我好好，我係唔捨得同事，之後會休息一下先，多謝傳媒幫我公布呢件事，但我仲有戲癮，所以都可以繼續搵我拍戲。」