服務無綫12年　田蕊妮宣布離巢

無綫「視后」田蕊妮錄影新春節目，受訪時，講到她缺席台慶頒獎禮令外間揣測她離巢？她笑說：「近半年大家都知我成為咗一個旅行家，好似瞬間看地球咁。不過我係即將離開TVB，但唔係因呢個問題唔出席頒獎禮，係因為我唔喺香港。（幾時離開無綫？）仲有個幾月，唔使咁可惜，呢個係自然定律。我哋嘅關係仲好好。唔覺唔覺喺TVB都已經12年，仲耐過我喺亞視，要合作嘅監製、演員都合作過，我就係一個咁樣嘅人，想睇吓自己有咩可以進步，想畀啲衝擊自己，睇吓出面嘅世界，不過TVB真係一個好好平台。」

問到捨不捨得？她說：「呢個圈永遠係圓嘅，永遠唔知將來會係點，唔知會唔會喺呢度見番我，亦唔知會唔會出面見到啲舊同事。（提早解約？）唔係，係正常完約。（會唔會簽部頭約？）冇，自己選擇唔想咁樣，自己係唔鍾意留後路嘅人。（傳聞簽古天樂？）傳聞嘅嘢我冇回應。（有咩發展？）自己都未知。（裸辭？）我有着衫㗎，其實有啲計劃，等落實再講。（有冇挽留你？）有傾嘅，都好愉快。」田蕊妮又否認離巢與政治取態有關。

無綫高層樂易玲表示：「其實大家都是一個好艱難的決定⋯⋯她一直是一個非常好、非常專業的演員，但覺得在這刻公司都無辦法安排更多的發展给她........衷心謝謝她多年來對公司的支持，祝她一切順利、心想事成。」問到會否與阿田再合作，樂易玲說：「看機會....」