老友是非當人情　Aka教你揀朋友！

又到《拆彈》時候，今集有請Aka＠Super Girls！

網民Carman話：「我喺公司同一個同事好friend，無所不談，佢份人都幾好，但就太口多，正一是非精，是非當人情，又鍾意搞小動作，我唔想再聽佢講是非，但佢對我好好，唔想冇咗呢個朋友，我應該點做？」

Aka就話：「首先，一個是非當人情嘅人，其實佢喺你面前講人哋是非嘅時候，我深信佢喺其他人面前都有講你，因為講是非已經成為佢哋嘅習慣。可能對佢哋而言，已經唔係一件事情而係成日做嘅嘢！究竟你自己係咪應該繼續將你事情講畀佢聽呢？我覺得為咗保護自己，可能都要講少啲！至於唔想冇咗呢個朋友，有啲咩方法呢？我就認為佢同你講是非嘅時候，你就用另一個方法同佢講番，可能用正面嘅諗法引導佢去正面嘅思想。若然呢個方法都唔得嘅話，我覺得冇咗咁嘅朋友都唔係一個好大嘅損失，所以我覺得人大咗，要識得選擇自己嘅朋友。」