自爆使老婆錢!羅力威男主內做家務勁自豪

2020年01月15日 00:00
東網電視
更多新聞短片
羅力威唔介意同人講「使老婆錢」!
近年在樂壇並不活躍的羅力威(Adason),從未想過放棄音樂:「應該話冇乜需要去放棄。」極具音樂才華的他能一手包辦曲詞編曲,甚至監製:「我喺呢方面比別人強,我可以彈到唱到,我可以為人伴奏,可以為人唱生日歌,我唔需要放棄佢,音樂永遠陪伴我嘅生命,我永遠會彈琴畀老婆(雨僑)聽、畀貓仔聽,或者寫一隻歌畀自己。」
老婆幫手找數
在香港樂壇機制下,他坦承收入或會有影響,慶幸他本身為人節儉,並非物質追求者,在他眼中所有物品都有一個價值,他坦言:「我覺得一套衫貴極頂盡千幾二千蚊,手機唔應該過一萬蚊,當然幾千萬嘅靚車都有,但我覺得幾萬到幾十萬已經好盡,我係好慳,當然慳唔會令你富有咗,慳只不過我嘅價值觀係咁。」他坦言自己不是富裕家庭,要努力搵錢交租,不介意笑說:「當我收入差嘅時候,咁啱娶咗個老婆,有時佢收入好嘅,可以幫你處理到一啲你處理唔到嘅支出,好多時都歸功於我老婆,我都唔介意講囉。」
晾衫有技巧
結婚兩年阿威在家中專責打理家頭細務,他更自豪說:「我做得好就我做。」每朝早他定必花一小時打掃,由吸塵洗地抹枱到洗衫,全部一腳踢,他說:「總之所有嘢都係我做,我做得好好嘅,唔需要佢,千祈唔好洗我啲碗,因為我唔會覺得你洗得乾淨過我。」他笑言晾男人衫好快捷,可以兩分鐘就晾完衫褲孖煙囪,相反晾女人衫就複雜得多,他笑說:「件衫呢邊有兩條繩,嗰邊啲扣又唔知搭邊邊,啲長度又怪,又短又斜,有啲質地未見過,唔知係咪地球物質,我一晾女人衫頭都痛埋。」
請工人會失落
除了對老婆照顧周到,他對愛妻的貓貓同樣服侍有加:「我朝早餵佢食呢個味,夜晚會餵另一種,跟住觀察佢啲便便,發現有啲奇怪冇咁好嘅,就換另一種再觀察,所以我唔鍾意阿僑突然去餵佢,因為佢唔會知我餵咗咩味或者牌子,邊啲營養吸收,或者佢啲便便會點,所以通常我鍾意自己一個人做晒,呢個係我最自豪地方,他笑言:「形成咗如果將來有一日請工人姐姐,我會變得好失落,冇晒嘢做。」