男友嫌慢唔等埋　陳庭欣佛系滑雪冇人理

前港姐陳庭欣（Toby）近日完成新戲拍攝，辛苦咗一排當然就要去旅行輕鬆吓啦！見佢同男友楊振源（Benny）去咗日本北海道滑雪，並喺網上大晒玩樂照，見佢兩個喺雪地下齊齊合照，Toby仲高舉V字，之後Benny再嚟個「男友視角」，幫Toby大影chok照！有眼利網民見到着上粉紅色滑雪裝嘅Toby，原來件衫仲有個「NASA」嘅徽章，難怪Toby都自嘲係「識少少滑雪嘅太空人」！佢仲話今次滑雪好過上次，速度快咗唔少，不過都係屬於「佛系滑雪」，佢去到山腰時啲人都滑到冇影，就連Benny都唔喺身邊，畀人「遺棄」嘅感覺肯定唔好受，難怪佢都話：「我滑得超級慢，都冇人等我啦！」雖然係咁，Toby冇放棄仲由朝滑到晚，相信佢嘅技術好快會追到男友，到時就可以一齊玩啦！