邊開大邊玩！陳柏宇老婆爆囡囡「臭」事

歌手陳柏宇（Jason）趁農曆新年前，舉家去到吉隆坡玩，喺呢趟旅程佢主力去打Golf，而老婆符曉薇（Leanne）就孖囡囡Abigail周圍去玩，只有歲幾嘅Abi名副其實係「空姐」，飛行經驗豐富，出走嘅次數一隻手都唔夠數，實行用眼睛看世界。Leanne一直都有喺社交網分享同Abi嘅玩樂行程，帶埋Fans去旅行，期間都不忘大爆囡囡「臭」事，事緣佢同Abi去玩積木，一開始見「下身失蹤」嘅Abi好專注咁伸手入箱摷積木，點知喺呢個時候就被Leanne發現佢實情係「開大」，下一秒就見Abi扶住個箱邊，面仔谷到紅晒咁，認真爆笑！完事後，Abi若無其事繼續玩積木，仲遞積木畀Leanne想一齊玩添，勁搞笑，Leanne一邊大叫「好臭」、一邊笑話下個行程係要去買尿片，因為唔夠用，笑爆一眾網民。