黃曉明呢？Baby帶囝囝見偶像慶祝3歲生日

藝人Angelababy同黃曉明喺2015年成婚之後生咗個囝囝「小海綿」，話咁快佢已經3歲大啦！尋晚Baby喺社交網晒出同小海綿慶生嘅相，知道囝囝嘅喜好仲專登安排咗偶像現身，呢位令到小海綿咁着迷，就係好多人都鍾意嘅「鹹蛋超人」，可以同偶像合照小海綿勁興奮，除咗一齊擺出放死光嘅招牌Pose外，超人仲高舉三隻手指代表3歲生日，為小海綿送上祝福。不過就有眼利網友見到現場紙牌印錯「3th」，正確英文應為「3rd」。

睇番啲相係唔見黃曉明嘅蹤影，有粉絲就爆料話佢喺劇組努力工作緊，先至抽唔到身出嚟同小海綿慶祝生日，去到今朝早黃曉明先喺社交網分享番Baby同小海綿慶生嘅Po，留言話：「3歲啦！永遠做你的奧特曼（港譯鹹蛋超人）！」睇嚟佢應該係拍到天光先收工，佢為咗搵錢養家都真係搏晒命。