寸JW有靠山　吳業坤被反嘲冇頭髮

《2019年度勁歌金曲頒獎典禮》頒發「勁歌金曲獎」前，司儀陸浩明（6號）坐在歌手席的吳業坤及JW的位置，問JW、坤坤和胡鴻鈞都未攞獎，問他們現時仍未攞獎，如果輸給對方會輸乜？坤坤笑言：「如果輸畀胡鴻鈞係輸畀佢進化緊。」令人聯想起有傳他面容進化，全埸爆笑！6號叫他講清楚些，坤坤笑言：「唔可以講，歌曲方面佢進化緊，同埋《降魔的》佢都進化緊，去到2.0。」他又笑言如果輸畀JW就是輸畀她有靠山，暗指她有有米男友。

而JW就謂輸畀坤坤是因為對方少咁樣嘢：「因為佢少咗啲頭髮，如果佢有啲嘢少咗就應該會有啲嘢多番，所以要番啲獎。」之後她都補鑊：「但依家佢頭髮情況都好番好多。」而胡鴻鈞亦謂JW講得好好，如果自己輸畀坤坤都是輸頭髮：「但可以輸多樣嘢，就係我冇咗副眼鏡，至於其他嘢我都好難輸畀佢。」

然後頒發3首「勁歌金曲獎」，分別是胡鴻鈞《為愛冒險》、吳業坤《和懷念講再見》及JW的《逃生門》。